Job 18

Bildad i tata kapa ure nam ba na vana rikai pire ra umana tena varpiam

1Ma Bildad ra te Sua i ga tata ma i ga biti:

2Na par vingaia kaum tinikan upi ra umana kalamana tinata?
Una ki na nuknuk, ma namur amital a tata.
3Dave di nuknuk ba amital a utul a vavaguai?
A utul a tuptup ta ra luaina matam?
4U nina u kanener ma ra kankan,
Dave, ra rakarakan a gunagunan na ki na lingling ure u?
Ba da kap vaire vue ra vat kan kana pakana?
5Da pun ra kapa i ra tena varpiam,
Ma ra birao ta kana iap pa na rarao.
6Ra kapa ta ra kubana na bobotoi,
Ma ra lamp taun ra uluna, da pun ia.
7Di vatutukana kana tak keke,
Ma kana varpit na vabura ia.
8A ura kauna dir rap tar ia ta ra ubene,
Ma i rua ra tubatuba ai ra kun.
9A inabut na kakene i papa ta ra kun,
Ma ra vapir i tut me.
10Ma di pale ive pa ia aro ra pia,
Di kapi bat ra ngaina me.
11A umana magit na bunurut dia ki kikil ia, diat a vaburut ia,
Ma diat a karat ra inabut na kakene.
12A dekdekina i panie ta ra mulmulum,
A varmonong i kiki pa ia pi na bura.
13A minait na en ra umana ingar i ra pakana,
Maia, a kaina minait na en ra umana rakana tana.
14Da rubat vue kan ra magit i ga nurnur tana,
Ma da al pa ia tadav ra luluai na bunurut.
15A umana vaira diat a ki ta ra kubana,
Ma da imire ra pakar ta kana pakana.
16A umana okorina diat a maroto ara ra pia tana,
Ma ra umana ingarina arama liu da mut vue.
17Pa da nuk pa mule ta ra rakarakan a gunagunan,
Ma ra iangina na panie ta ra bala na gunan.
18Da korot vue kan ra kapa tadav ra bobotoi,
Ma da korot vue kan ra rakarakan a gunagunan.
19Ba i tar mat, pa ta na na tur kia ia, ta natuna, a tutana, ba ta tubuna, a tutana,
Pa ta tikai na ki valili ta ra kubana.
20Diat maro ra matana taoai diat a kaian ure kana bung,
Ma diat ta ra matana taur diat a ga burut.
I damana ra kubakuba i ra umana tena varpiam,
I damana ra pakana kai nam ra tutana ba pa i nunure God.
21